غنیم سے بھی عداوت میں حد نہیں مانگی 

کہ ہار مان لی لیکن مدد نہیں مانگی 

ہزار شکر کہ ہم اہل حرف زندہ نے 

مجاوران ادب سے سند نہیں مانگی 

بہت ہے لمحۂ موجود کا شرف بھی مجھے 

سو اپنے فن سے بقائے ابد نہیں مانگی 

قبول وہ جسے کرتا وہ التجا نہیں کی 

دعا جو وہ نہ کرے مسترد نہیں مانگی 

میں اپنے جامۂ صد چاک سے بہت خوش ہوں 

کبھی عبا و قبائے خرد نہیں مانگی 

شہید جسم سلامت اٹھائے جاتے ہیں 

جبھی تو گور کنوں سے لحد نہیں مانگی 

میں سر برہنہ رہا پھر بھی سر کشیدہ رہا 

کبھی کلاہ سے توقیر قد نہیں مانگی 

عطائے درد میں وہ بھی نہیں تھا دل کا غریب 

فرازؔ میں نے بھی بخشش میں حد نہیں مانگی 

ग़नीम से भी अदावत में हद नहीं माँगी 

कि हार मान ली लेकिन मदद नहीं माँगी 

हज़ार शुक्र कि हम अहल-ए-हर्फ़-ए-ज़िंदा ने 

मुजाविरान-ए-अदब से सनद नहीं माँगी 

बहुत है लम्हा-ए-मौजूद का शरफ़ भी मुझे 

सो अपने फ़न से बक़ा-ए-अबद नहीं माँगी 

क़ुबूल वो जिसे करता वो इल्तिजा नहीं की 

दुआ जो वो न करे मुस्तरद नहीं माँगी 

मैं अपने जामा-ए-सद-चाक से बहुत ख़ुश हूँ 

कभी अबा-ओ-क़बा-ए-ख़िरद नहीं माँगी 

शहीद जिस्म सलामत उठाए जाते हैं 

जभी तो गोर-कनों से लहद नहीं माँगी 

मैं सर-बरहना रहा फिर भी सर-कशीदा रहा 

कभी कुलाह से तौक़ीर-ए-क़द नहीं माँगी 

अता-ए-दर्द में वो भी नहीं था दिल का ग़रीब 

'फ़राज़' मैं ने भी बख़्शिश में हद नहीं माँगी