جب تجھے یاد کریں کار جہاں کھینچتا ہے 

اور پھر عشق وہی کوہ گراں کھینچتا ہے 

کسی دشمن کا کوئی تیر نہ پہنچا مجھ تک 

دیکھنا اب کے مرا دوست کماں کھینچتا ہے 

عہد فرصت میں کسی یار گزشتہ کا خیال 

جب بھی آتا ہے تو جیسے رگ جاں کھینچتا ہے 

دل کے ٹکڑوں کو کہاں جوڑ سکا ہے کوئی 

پھر بھی آوازۂ آئینہ گراں کھینچتا ہے 

انتہا عشق کی کوئی نہ ہوس کی کوئی 

دیکھنا یہ ہے کہ حد کون کہاں کھینچتا ہے 

کھنچتے جاتے ہیں رسن بستہ غلاموں کی طرح 

جس طرف قافلۂ عمر رواں کھینچتا ہے 

ہم تو رہوار زبوں ہیں وہ مقدر کا سوار 

خود ہی مہمیز کرے خود ہی عناں کھینچتا ہے 

رشتۂ تیغ و گلو اب بھی سلامت ہے فرازؔ 

اب بھی مقتل کی طرف دل سا جواں کھینچتا ہے 

जब तुझे याद करें कार-ए-जहाँ खेंचता है 

और फिर इश्क़ वही कोह-ए-गिराँ खेंचता है 

किसी दुश्मन का कोई तीर न पहुँचा मुझ तक 

देखना अब के मिरा दोस्त कमाँ खेंचता है 

अहद-ए-फ़ुर्सत में किसी यार-ए-गुज़िश्ता का ख़याल 

जब भी आता है तो जैसे रग-ए-जाँ खेंचता है 

दिल के टुकड़ों को कहाँ जोड़ सका है कोई 

फिर भी आवाज़ा-ए-आईना-गिराँ खेंचता है 

इंतिहा इश्क़ की कोई न हवस की कोई 

देखना ये है कि हद कौन कहाँ खेंचता है 

खिंचते जाते हैं रसन-बस्ता ग़ुलामों की तरह 

जिस तरफ़ क़ाफ़िला-ए-उम्र-ए-रवाँ खेंचता है 

हम तो रहवार-ए-ज़बूँ हैं वो मुक़द्दर का सवार 

ख़ुद ही महमेज़ करे ख़ुद ही इनाँ खेंचता है 

रिश्ता-ए-तेग़-ओ-गुलू अब भी सलामत है 'फ़राज़' 

अब भी मक़्तल की तरफ़ दिल सा जवाँ खेंचता है