خواب کی حالتوں کے ساتھ تیری حکایتوں میں ہیں 

ہم بھی دیار اہل دل تیری روایتوں میں ہیں 

وہ جو تھے رشتہ ہائے جاں، ٹوٹ سکے بھلا کہاں 

جان وہ رشتہ ہائے جاں اب بھی شکایتوں میں ہیں 

ایک غبار ہے کہ ہے دائرہ وار پر فشاں 

قافلہ ہائے کہکشاں تنگ ہیں وحشتوں میں ہیں 

وقت کی درمیانیاں کر گئیں جاں کنی کو جاں 

وہ جو عداوتیں کہ تھیں آج محبتوں میں ہیں 

پرتو رنگ ہے کہ ہے دید میں جانشین رنگ 

رنگ کہاں ہیں رونما رنگ تو نکہتوں میں ہیں 

ہے یہ وجود کی نمود اپنی نفس نفس گریز 

وقت کی ساری بستیاں، اپنی ہزیمتوں میں ہیں 

گرد کا سارا خانماں ہے سر دشت بے اماں 

شہر ہیں وہ جو ہر طرح گرد کی خدمتوں میں ہیں 

وہ دل و جان صورتیں جیسے کبھی نہ تھیں کہیں 

ہم انہیں صورتوں کے ہیں ہم انہیں صورتوں میں ہیں 

میں نہ سنوں گا ماجرا معرکہ ہائے شوق کا 

خون گئے ہیں رائیگاں رنگ ندامتوں میں ہیں 

ख़्वाब की हालातों के साथ तेरी हिकायतों में हैं 

हम भी दयार-ए-अहल-ए-दिल तेरी रिवायतों में हैं 

वो जो थे रिश्ता-हा-ए-जाँ टूट सके भला कहाँ 

जान वो रिश्ता-हा-ए-जाँ अब भी शिकायतों में हैं 

एक ग़ुबार है कि है दायरा-वार पुर-फ़िशाँ 

क़ाफ़िला-हा-ए-कहकशाँ तंग हैं वहशतों में हैं 

वक़्त की दरमियानियाँ कर गईं जाँ-कनी को जाँ 

वो जो अदावतें कि थीं आज मोहब्बतों में हैं 

परतव-ए-रंग है कि है दीद में जाँ-नशीन-ए-रंग 

रंग कहाँ हैं रूनुमा रंग तो निकहतों में हैं 

है ये वजूद की नुमूद अपनी नफ़स नफ़स गुरेज़ 

वक़्त की सारी बस्तियाँ अपनी हज़ीमतों में हैं 

गर्द का सारा ख़ानुमाँ है सर-ए-दश्त-ए-बे-अमाँ 

शहर हैं वो जो हर तरह गर्द की ख़िदमतों में हैं 

वो दिल ओ जान सूरतें जैसे कभी न थीं कहीं 

हम उन्हीं सूरतों के हैं हम उन्हीं सूरतों में हैं 

मैं न सुनूँगा माजरा मा'रका-हा-ए-शौक़ का 

ख़ून गए हैं राएगाँ रंग नदामतों में हैं