طفلان کوچہ گرد کے پتھر بھی کچھ نہیں 

سودا بھی ایک وہم ہے اور سر بھی کچھ نہیں 

میں اور خود کو تجھ سے چھپاؤں گا یعنی میں 

لے دیکھ لے میاں مرے اندر بھی کچھ نہیں 

بس اک غبار وہم ہے اک کوچہ گرد کا 

دیوار بود کچھ نہیں اور در بھی کچھ نہیں 

یہ شہر دار و محتسب و مولوی ہی کیا 

پیر مغان و رند و قلندر بھی کچھ نہیں 

شیخ حرام لقمہ کی پروا ہے کیوں تمہیں 

مسجد بھی اس کی کچھ نہیں منبر بھی کچھ نہیں 

مقدور اپنا کچھ بھی نہیں اس دیار میں 

شاید وہ جبر ہے کہ مقدر بھی کچھ نہیں 

جانی میں تیرے ناف پیالے پہ ہوں فدا 

یہ اور بات ہے ترا پیکر بھی کچھ نہیں 

یہ شب کا رقص و رنگ تو کیا سن مری کہن 

صبح شتاب کوش کو دفتر بھی کچھ نہیں 

بس اک غبار طور گماں کا ہے تہ بہ تہ 

یعنی نظر بھی کچھ نہیں منظر بھی کچھ نہیں 

ہے اب تو ایک جال سکون ہمیشگی 

پرواز کا تو ذکر ہی کیا پر بھی کچھ نہیں 

کتنا ڈراؤنا ہے یہ شہر نبود و بود 

ایسا ڈراؤنا کہ یہاں ڈر بھی کچھ نہیں 

پہلو میں ہے جو میرے کہیں اور ہے وہ شخص 

یعنی وفائے عہد کا بستر بھی کچھ نہیں 

نسبت میں ان کی جو ہے اذیت وہ ہے مگر 

شہ رگ بھی کوئی شے نہیں اور سر بھی کچھ نہیں 

یاراں تمہیں جو مجھ سے گلہ ہے تو کس لئے 

مجھ کو تو اعتراض خدا پر بھی کچھ نہیں 

گزرے گی جونؔ شہر میں رشتوں کے کس طرح 

دل میں بھی کچھ نہیں ہے زباں پر بھی کچھ نہیں 

तिफ़्लान-ए-कूचा-गर्द के पत्थर भी कुछ नहीं 

सौदा भी एक वहम है और सर भी कुछ नहीं 

मैं और ख़ुद को तुझ से छुपाऊँगा या'नी मैं 

ले देख ले मियाँ मिरे अंदर भी कुछ नहीं 

बस इक गुबार-ए-वहम है इक कूचा-गर्द का 

दीवार-ए-बूद कुछ नहीं और दर भी कुछ नहीं 

ये शहर-दार-ओ-मुहतसिब-ओ-मौलवी ही क्या 

पीर-ए-मुग़ान-ओ-रिन्द-ओ-क़लंदर भी कुछ नहीं 

शैख़-ए-हराम-लुक़्मा की पर्वा है क्यूँ तुम्हें 

मस्जिद भी उस की कुछ नहीं मिम्बर भी कुछ नहीं 

मक़्दूर अपना कुछ भी नहीं इस दयार में 

शायद वो जब्र है कि मुक़द्दर भी कुछ नहीं 

जानी मैं तेरे नाफ़-पियाले पे हूँ फ़िदा 

ये और बात है तिरा पैकर भी कुछ नहीं 

ये शब का रक़्स-ओ-रंग तो क्या सुन मिरी कुहन 

सुब्ह-ए-शिताब-कोश को दफ़्तर भी कुछ नहीं 

बस इक ग़ुबार तूर-ए-गुमाँ का है तह-ब-तह 

या'नी नज़र भी कुछ नहीं मंज़र भी कुछ नहीं 

है अब तो एक जाल सुकून-ए-हमेशगी 

पर्वाज़ का तो ज़िक्र ही क्या पर भी कुछ नहीं 

कितना डरावना है ये शहर-ए-नबूद-ओ-बूद 

ऐसा डरावना कि यहाँ डर भी कुछ नहीं 

पहलू में है जो मेरे कहीं और है वो शख़्स 

या'नी वफ़ा-ए-अहद का बिस्तर भी कुछ नहीं 

निस्बत में उन की जो है अज़िय्यत वो है मगर 

शह-रग भी कोई शय नहीं और सर भी कुछ नहीं 

याराँ तुम्हें जो मुझ से गिला है तो किस लिए 

मुझ को तो ए'तिराज़ ख़ुदा पर भी कुछ नहीं 

गुज़रेगी 'जौन' शहर में रिश्तों के किस तरह 

दिल में भी कुछ नहीं है ज़बाँ पर भी कुछ नहीं